‘பாரிஸ் கஃபே’ பட விமர்சனம் - விமர்சிப்பவர் சென்னை பத்திரிகா சிவாஜி

‘பாரிஸ் கஃபே’ பட விமர்சனம் - விமர்சிப்பவர் சென்னை பத்திரிகா சிவாஜி

அரசு மருத்துவரான குரு சோமசுந்தரம், மருத்துவ கருத்தரங்கு ஒன்றுக்காக பாரிஸ் நகருக்கு செல்கிறார். அங்கிருக்கும் கஃபே ஒன்றில் தமிழகத்தைச் சேர்ந்த இளம் காதல் ஜோடியின் புகைப்படத்தை பார்த்து அதிர்ச்சியடைபவர், அந்த புகைப்படம் குறித்தும், அவர்கள் பற்றியும் அறிந்துக் கொண்டு பதட்டம் அடைகிறார். பிறகு சென்னை திரும்புபவர்,  தன் மனைவி அனுமோலிடம் அந்த காதல் ஜோடி பற்றியும், அவர்கள் தற்போது உயிருடன் இல்லை, என்பதையும் தெரிவிக்கிறார்.

கணவரின் பதட்டமான நிலையை உணர்ந்து, அவர் அளித்த தகவலின்படி, அந்த காதல் ஜோடி பற்றிய தகவல்களை சேகரிக்கும் அனுமோல், அந்த காதல் ஜோடி ஆணவப் படுகொலை செய்யப்பட்டதையும், அதை பணம் மற்றும் அரசு பதவி பலம் மிக்கவர்கள் மறைத்திருப்பதோடு, அந்த சதியில் தனது கணவருக்கும் தொடர்பு இருப்பதை அறிந்துக் கொள்கிறார். உடனே கணவர் மீது கோபப்பட்டு அவரை பிரிந்து விடுகிறார். அமெரிக்காவில் இருக்கும் குரு சோமசுந்தரம் - அனுமோல் தம்பதியின் மகள் அர்ச்சனா விசயம் அறிந்து, தனது பெற்றோரை சேர்த்து வைப்பதற்காக சென்னை வருகிறார். அவரது முயற்சி வெற்றி பெற்றதா ?, காதல் திருமணம் செய்துக் கொண்ட குரு சோமசுந்தரம், ஆணவப் படுகொலையில் சம்மந்தப்பட்டது எப்படி ?, தன் மனைவியின் கோபத்தை தனித்து அவருடன் மீண்டும் சேர்ந்து வாழ அவர் என்ன செய்தார் ?, என்பது தான் படத்தின் மீதிக்கதை.

முதன்மை கதாபாத்திரங்களில், கணவன் - மனைவியாக நடித்திருக்கும் குரு சோமசுந்தரம் மற்றும் அனுமோல் இருவரும் இயல்பான நடிப்பின் மூலம் திரைக்கதைக்கு பலம் சேர்த்திருக்கிறார்கள்.

ஆணவப் படுகொலையை மறைப்பதற்கு தனது கணவரும் உடந்தையாக இருந்ததை அறிந்து கோபமடையும் அனுமோல், அதனால் பாதிக்கப்படும் குடும்பங்களின் குரலாகவும், அவர்களின் கோபமாகவும் தனது கதாபாத்திரத்தை உணர்வுப்பூர்வமாக கையாண்டிருக்கிறார்.

குற்றம் என்றாலும் குடும்பத்திற்காக செய்து விட்டு, அதே குடும்பத்திற்காக குற்றத்திற்கான  தண்டனையை அனுபவிக்கவும் தயாராக இருக்கும் குரு சோமசுந்தரம், தன் அளவான நடிப்பின் மூலம் ஸ்கோர் செய்வதோடு, அவ்வபோது நகைச்சுவை உணர்வு மிக்க வசன உச்சரிப்பு மூலம் சிரிக்க வைக்கிறார்.

இளம் காதல் ஜோடிகளாக நடித்திருக்கும் விஜய் விஷ்வா மற்றும் அர்ச்சனா, துள்ளல் நடிப்பு மூலம் காட்சிகளுக்கு புத்துணர்ச்சியளித்திருக்கிறார்கள்.  மற்றொரு ஜோடியான சாய் விக்கி மற்றும் நயனா சாய் இதயத்தை கனக்க செய்யும் விதத்தில் நடித்திருக்கிறார்கள்.

ஒளிப்பதிவாளர் சதீஷ்.ஜி, அமெரிக்கா மற்றும் பாரிஸ் போன்ற வெளிநாடுகளை கிராபிக்ஸ் மூலம் கச்சிதமாக காட்சிகளுடன் இணைத்திருப்பதோடு, தயாரிப்பாளரின் பட்ஜெட்டுக்கு ஏற்றவாறு காட்சிகளை படமாக்கியிருக்கிறார்.

கே இசையில் பாடல்கள் அனைத்தும் கேட்கும் ரகங்கள். பின்னணி இசையும் படத்திற்கு பலம் சேர்க்கும் வகையில் பயணித்திருக்கிறது.

ஆணவப் படுகொலையும், அதன் பின்னணி பற்றியும் பேசும் கதையாக இருந்தாலும், அதை வித்தியாசமான பாணியில் கையாண்டிருக்கும் இயக்குநருக்கு படத்தொகுப்பாளர் வி.ஜே.சாபு ஜோசப் பணி பெரிய அளவில் கை கொடுத்திருக்கிறது.

ஆணவப் படுகொலைகளுக்கு எதிராக குரல் கொடுத்திருக்கும் இயக்குநர் சரஜ் சீலன், அதை ஒரு பிரச்சாரம் அல்லது போதனையாக அல்லாமல், இளம் காதல் ஜோடி மற்றும் இன்ப துன்பங்களை ஒன்றாகக் கடந்து வாழும் தம்பதி மூலம் அழகான காதல் கதையாகவும், சுவாரஸ்யம் மிக்க விறுவிறுப்பான திரைக்கதையோடும் சொல்லியிருக்கிறார்.

சினிமாவை வெறும் பொழுதுபோக்கிற்கான சாதனமாக பார்க்காமல், சமூகப் பிரச்சனைகளை மக்கள் மத்தியில் கொண்டு சேர்க்கும் வலிமையான ஊடகம் என்பதை உணர்ந்து தங்களது முதல் படத்திலேயே சமூகப் பிரச்சனைப் பற்றி பேசிய இயக்குநர்கள் பட்டியலில் இப்படத்தின் இயக்குநர் சரஜ் சீலனும் இடம் பிடித்திருக்கிறார்.

பொழுதுபோக்கு திரைப்படமாக இருந்தாலும், அதை சமூக பொறுப்புணர்வுடன் கையாண்டிருக்கும் இயக்குநர் சரஜ் சீலன் உள்ளிட்ட ‘பாரிஸ் கஃபே’ படக்குழுவுக்கு சென்னை பத்திரிகாவின் வாழ்த்துகளும், பாராட்டுகளும்.