தேசிய அடையாளத்தை கண்டறிவதற்கான புனித தலம் காசி

தென்னிந்தியாவின் பண்பாட்டு உலகம் காசியில் உள்ள கேதர்காட் மற்றும் ஹனுமன்காட்டில் குடிகொண்டுள்ளது. காசி என்பது கோவில்கள், படித்துறைகள் மற்றும் சமயச்சடங்குகளின் நகரம் மட்டுமல்ல, அது இந்தியாவின் பண்பாட்டு உணர்வு, மொழி ஒற்றுமை மற்றும் தேசிய மறுமலர்ச்சியின் துடிப்பான பூமியாகவும் திகழ்கிறது. இங்கு, தடையற்ற கங்கை நதியின் ஓட்டம், நாட்டின் பல்வேறு மொழிகள், மரபுகள் மற்றும் சித்தாந்தங்களின் சங்கமமாக விளங்குகிறது. இந்த பண்பாட்டு பாரம்பரியத்தை புதிய தலைமுறைக்கு கொண்டு சேர்ப்பதற்கான ஒரு முக்கிய முயற்சியே காசி தமிழ்ச் சங்கமம் ஆகும்.

இந்த நிகழ்வு, தமிழ்நாட்டுக்கும், காசிக்கும் இடையிலான பல நூற்றாண்டுகள் பழமையான ஆன்மிக, இலக்கிய மற்றும் சமூக பிணைப்புகளுக்கு ஒரு புதிய பரிமாணத்தைச் சேர்க்கிறது. காசிக்கு வரும் தமிழ் பக்தர்களுக்கு, கங்கையில் நீராடுவதும், பாபா விஸ்வநாதரை தரிசிப்பதும் இயல்பாகவே மிக முக்கியமான சமய மரபாகும். ஆனால் அவர்களின் பயணம் தசாஸ்வமேத் படித்துறை, விஸ்வநாத் தாம் அல்லது கங்கா ஆரத்தியுடன் நின்றுவிடுவதில்லை. அவர்கள் கேதர்காட் மற்றும் ஹனுமன்காட் ஆகிய இடங்களுக்கும் செல்கின்றனர்.

இந்த படித்துறைகளில், அவர்கள் தங்கள் முன்னோர்களின் பண்பாட்டு நினைவுகளையும், தென்னிந்திய மடாலயங்களின் மரபுகளையும், தமிழ் மொழியின் நெருக்கத்தையும், மகா கவி சுப்பிரமணிய பாரதியின் வாழ்க்கையுடன் தொடர்புடைய பாரம்பரியத்தையும் கண்டறிகிறார்கள்.

இதனால்தான் கேதர்காட்டில் உள்ள

சுப்பிரமணிய பாரதியின் வரலாற்று சிறப்புமிக்க இல்லம், தமிழ் சமூகத்துக்கு ஒரு புனித யாத்திரைக்கு சற்றும் குறைவானதல்ல.

இங்கு வருகை தருவது ஒரு மாபெரும் கவிஞரின் இல்லத்தைப் பார்ப்பது மட்டுமல்ல, தேசியம், சமூக சமத்துவம், பெண்கள் விடுதலை மற்றும் இந்திய கலாசார ஒற்றுமை ஆகிய கருத்துகள் புதிய வெளிப்பாட்டைக் கண்ட வரலாற்றுச் சூழலையும் பார்ப்பதுமாகும். கேதர்காட் மற்றும் ஹனுமன்காட்டின் அடையாளம் தமிழ் குடும்பங்கள் மற்றும் பாரதியின் இல்லத்துடன் மட்டும் நின்றுவிடவில்லை. இங்கு அமைந்துள்ள மடங்களும், மத நிறுவனங்களும் பல நூற்றாண்டுகளாக வட மற்றும் தென் இந்தியாவுக்கு இடையேயான ஆன்மிக உரையாடலை உயிர்ப்புடன் வைத்திருக்கின்றன.

கேதர்காட் அருகே அமைந்துள்ள சிருங்கேரி சங்கர மடம் தனக்கே உரிய தனித்துவமான பாரம்பரியத்தைக் கொண்டுள்ளது. வாரணாசியில் உள்ள இந்த மடத்தின் பாரம்பரியம், 14 -ம் நூற்றாண்டில் ஆதி சங்கராச்சாரிய பாரம்பரியத்தைச் சேர்ந்த ஆச்சார்ய வித்யாரண்ய மகாசுவாமி காலத்திலிருந்து தொடங்குகிறது. இங்கு சந்திரமவுலீஸ்வரர், சாரதாம்பா தேவி மற்றும் ஆதி சங்கராச்சாரியார் ஆகியோர் வழிபடப்படுகின்றனர். நவராத்திரி மற்றும் மகாசிவராத்திரியின் போது சிறப்பு மத விழாக்கள் மற்றும் பல்வேறு வேத சடங்குகள் செய்யப்படுகின்றன.

மேலும், காசியில் காஞ்சி காமகோடி பீடம் மற்றும் பிற தென்னிந்திய மடாலயங்கள் இருப்பதும் இப்பகுதியை தனித்துவமாக்குகிறது. அனுமன் படித்துறையைச் சுற்றியுள்ள சமய நிறுவனங்கள், தென்னிந்திய பக்தர்களுக்கு வழிபாடு, ஆன்மிகப் படிப்பு மற்றும் தங்குமிட வசதிகளை வழங்கி வருகின்றன. காசி தமிழ் சங்கமத்தின் தொடக்க விழாவில் ஆற்றிய உரையில், பிரதமர் நரேந்திர மோடி, கேதார் படித்துறை மற்றும் அனுமன் படித்துறையைச் சுற்றி வசிக்கும் தமிழ் குடும்பங்களையும், காசியின் வளர்ச்சிக்கு அவர்கள் ஆற்றிய பங்களிப்பையும் குறிப்பிட்டார். காசிக்கும் தமிழ்நாட்டுக்கும் இடையிலான உறவை, இந்தியாவின் ஆயிரக்கணக்கான ஆண்டுகால கலாசார ஒற்றுமைக்கு ஓர் உதாரணமாக விவரித்தார்.

தலைமுறை தலைமுறையாக தமிழ் குடும்பங்கள் இந்த படித்துறைகளைச் சுற்றி வாழ்ந்து வந்துள்ளனர். அவர்கள் காசியின் உள்ளூர் மரபுகளை ஏற்றுக்கொண்ட அதே வேளையில், தங்கள் மொழி, வழிபாட்டு முறைகள் மற்றும் கலாசார அடையாளத்தையும் பாதுகாத்து வந்துள்ளனர். இதுவே இந்திய கலாசாரத்தின் உண்மையான அடையாளம். பன்முகத்தன்மை அதன் அடையாளத்தை இழக்காமல் ஒன்றோடொன்று இணைந்து வாழ்கிறது.

கேதர்காட்டின் மத முக்கியத்துவம், சிவபெருமானின் கேதாரேசுவரர் வடிவத்துடன் தொடர்புடையது. இங்கு அமைந்துள்ள கேதாரேசுவரர் மகாதேவ் கோவில், தென்னிந்திய பக்தர்களுக்கு ஒரு சிறப்பு நம்பிக்கை மையமாக இருந்து வருகிறது. இக்கோவிலின் மத பாரம்பரியமும், கங்கை நதிக்கு அருகில் அது அமைந்துள்ள இடமும், காசியின் முக்கிய ஆன்மிகத் தலங்களில் ஒன்றாக இதை நிலைநிறுத்துகின்றன. தமிழ் பக்தர்களுக்கு, இங்கு வருகை தருவது என்பது, வட இந்தியாவில் தென்னிந்தியாவின் மத நினைவுகளுடன் இணைவதைப் போன்றது.

அனுமன் காட் பகுதியும், தென்னிந்திய மத மற்றும் கலாசார நடவடிக்கைகளுக்கு பெயர் பெற்றது. இங்கு பல்வேறு மடங்கள், கோவில்கள் மற்றும் ஆசிரமங்கள் இருப்பது, இதனை தமிழ் சமூகத்தினரின் ஆன்மீக வாழ்வின் ஒரு முக்கிய மையமாக மாற்றியுள்ளது. சங்கர மடமும், அதைச் சுற்றியுள்ள மத பாரம்பரியங்களும் இந்த கலாசாரத் தொடர்பை மேலும் வலுப்படுத்துகின்றன. இப்பகுதிகள் தமிழ் மொழி உரையாடல், தென்னிந்திய வழிபாட்டு முறைகள், மத விழாக்கள், பாரம்பரிய உணவு மற்றும் சமூக வாழ்க்கை ஆகியவற்றால் வகைப்படுத்தப்படுகின்றன. இதனால்தான் இவை பெரும்பாலும் காசியின் "மினி தமிழ்நாடு" என்று குறிப்பிடப்படுகின்றன. இங்கு வசிக்கும் குடும்பங்கள் காசியில் குடியேறிய புலம்பெயர்ந்த குடும்பங்கள் மட்டுமல்ல, அவர்கள் தலைமுறை தலைமுறையாக இந்த நகரத்தின் மத மற்றும் கலாசார அடையாளத்தை தழுவியவர்கள்.

காசி தமிழ் சங்கமத்தின் நோக்கம் பல நூற்றாண்டுகளாக வட இந்தியாவையும், தென் இந்தியாவையும் இணைத்து வந்த வரலாற்று பிணைப்புகளுக்கு புத்துயிர் அளிப்பதே  ஆகும். காசியில் தமிழ் சமூகம் வசிப்பது, தென்னிந்திய மடாலயங்களின் பாரம்பரியம், கேதாரேசுவரர் கோவிலின் மீதான பக்தி, மற்றும் மகா கவி சுப்பிரமணிய பாரதியின் இலக்கியப் பாரம்பரியம் ஆகியவை இந்த பிணைப்பிற்கு வாழும் சான்றுகளாகும். இந்த உறவு வெறும் மதரீதியானது மட்டுமல்ல, அது மொழி, இலக்கியம், தத்துவம், கல்வி மற்றும் தேசிய உணர்வையும் உள்ளடக்கியது. இன்று, நாடு பண்பாட்டு பாரம்பரியத்தைப் பாதுகாப்பது குறித்தும், புதிய தலைமுறைக்கு தேசிய ஒற்றுமையை வளர்ப்பது குறித்தும் விவாதித்துக் கொண்டிருக்கும் வேளையில், பாரதியின் வாழ்க்கையும், சிந்தனைகளும் சிறப்பு முக்கியத்துவம் பெறுகின்றன. அவர் தமிழ் மொழியைப் போற்றினார், ஆனால் தனது பார்வையை ஒருபோதும் பிராந்திய எல்லைகளுக்குள் சுருக்கிக்கொள்ளவில்லை. ஒருவர் தனது தாய்மொழியை நேசித்துக் கொண்டே, தேசத்தின் பரந்த பண்பாட்டு உணர்வுடன் தன்னை இணைத்துக் கொள்ள முடியும் என்பதை அவரது இலக்கியம் நிரூபிக்கிறது. காசிக்கு வரும் எந்தவொரு தமிழ் பக்தரும் கங்கையில் நீராடி, பாபா விஸ்வநாத் மற்றும் கேதார்காட் மகாதேவரை தரிசித்து, ஹனுமான் காட்டில் உள்ள பாரதியின் இல்ல வாசலில் தலைவணங்கும்போது, ​​அவர் உண்மையில் இந்தியாவின் கலாசார பாரம்பரியத்துக்கு மரியாதை செலுத்துகிறார். அதில் மதம், இலக்கியம் மற்றும் தேசிய உணர்வு ஆகியவை ஒன்றையொன்று நிறைவு செய்கின்றன.

கங்கை நதி, பாபா விஸ்வநாத், கேதார்நாத் மகாதேவ் மற்றும் மாபெரும் கவிஞர் சுப்பிரமணிய பாரதியின் அழியாத நினைவுகளின் இருப்பிடமாக காசி திகழ்கிறது. எனவே, தமிழ் சமூகத்துக்கு இந்த நகரம் ஒரு முக்தி அளிக்கும் இடமாக மட்டுமல்லாமல், தங்களின் மொழி, இலக்கியம், கலாசாரம் மற்றும் தேசிய அடையாளத்தை கண்டறிவதற்கான ஒரு புனித யாத்திரைத் தலமாகவும் விளங்குகிறது.