வானகரம் அப்போலோ ஸ்பெஷாலிட்டி மருத்துவமனையில் இரண்டு ஸ்மார்ட் ஆம்புலன்ஸ்கள் அறிமுகம்

வானகரம் மற்றும் அதனைச் சுற்றியுள்ள பகுதிகளில் அவசரகால மருத்துவ முதலுதவி சேவைகளை விரைவாகவும், சரியான நேரத்திலும் வழங்குவதற்காக, வானகரம் அப்போலோ ஸ்பெஷாலிட்டி மருத்துவமனையில் அதிநவீன உயிர் காக்கும் வசதிகள் கொண்ட இரண்டு 'ஸ்மார்ட்' ஆம்புலன்ஸ்கள் அறிமுகப்படுத்தப்பட்டுள்ளன. பில்லியன் ஹார்ட்ஸ் பீட்டிங் ஃபவுண்டேஷன் (BHB), அப்போலோ மருத்துவமனை மற்றும் மார்ஷ் இந்தியா ஆகிய மூன்று நிறுவனங்களின் கூட்டு முயற்சியின் ஒரு அங்கமாக இது செயல்படுத்தப்பட்டுள்ளது.

மார்ஷ் இந்தியாவின் கார்ப்பரேட் சமூகப் பொறுப்புணர்வு (CSR) திட்டத்தின் கீழ் இந்த முன்னெடுப்பிற்கு நிதி ஆதரவு வழங்கப்பட்டுள்ளது. பில்லியன் ஹார்ட்ஸ் பீட்டிங் ஃபவுண்டேஷன் இத்திட்டத்தினை செயல்படுத்தும் பங்காளராகவும், அப்போலோ மருத்துவமனை அவசரகால சிகிச்சை மற்றும் மருத்துவ நிபுணத்துவத்தை வழங்கும் அமைப்பாகவும் செயல்படுகின்றன. மருத்துவ அவசரநிலை ஏற்படும் இடத்திலேயே வழங்கப்படும்  முதலுதவி சிகிச்சை முதல், மருத்துவமனையில் பாதிப்பை உறுதிசெய்து வழங்கப்படும் சிகிச்சை வரை  நோயாளிக்கான அவசரகாலச் சிகிச்சையின் அனைத்து நிலைகளையும் வலுப்படுத்தும் குறிக்கோளோடு இந்த மூன்று நிறுவனங்களும் ஒருங்கிணைந்து செயல்படுகின்றன.

வானகரம் மற்றும் அதைச் சுற்றியுள்ள பகுதிகளில் நடைபெற்ற  சிறப்பு மருத்துவ முகாம்களில் இந்த இரண்டு அதிநவீன உயிர் காக்கும் ஆம்புலன்ஸ்களும் ஏற்கனவே பணியில் ஈடுபடுத்தப்பட்டு, அவசரகால சிகிச்சைக்கான  தயார்நிலை உறுதி செய்யப்பட்டிருக்கிறது. அத்துடன், மருத்துவச் சேவைகளை இப்பகுதியில் வாழும் மக்களுக்கு விரைவாகவும், விரிவாகவும் கொண்டுபோய் சேர்ப்பதற்கு இந்த ஸ்மார்ட் ஆம்புலன்ஸ்கள் சிறப்பான பங்களிப்பை வழங்கும்.

இந்நிகழ்வில் பேசிய அப்போலோ மருத்துவமனையின் (சென்னை மண்டலம்) தலைமைச் செயல் அதிகாரி டாக்டர் இளங்குமரன் கலியமூர்த்தி, "மருத்துவமனைக்கு உள்ளேயும் வெளியேயும் அவசரகாலச் சிகிச்சையின் பல்வேறு நிலைகளை வலுப்படுத்துவதே எப்போதும் எங்களின் அர்ப்பணிப்பாகவும், செயல்திட்டமாகவும் இருந்து வருகிறது. நோயாளிகளுக்கு அவசர சிகிச்சை தேவைப்படும் அந்த முக்கியமான முதல் சில நிமிடங்களுக்குள் அவர்களை விரைவாக சென்றடைந்து, உயிர்காக்கும் சிகிச்சையைத் தொடங்கும் எமது திறனை இந்த நவீன ஆம்புலன்ஸ்கள் கணிசமாக மேம்படுத்தும். கார்ப்பரேட் சமூகப் பொறுப்புணர்வு, மக்களை மையப்படுத்திய செயலாக்கம் மற்றும் மருத்துவ நிபுணத்துவம் ஆகியவை ஒன்றிணையும்போது எவ்வளவு பெரிய மருத்துவத் தேவைகளையும் சிறப்பான முறையில் பூர்த்தி செய்ய முடியும் என்பதற்கு இந்த கூட்டு முயற்சி ஒரு சிறந்த எடுத்துக்காட்டாகத் திகழ்கிறது" என்று கூறினார்.

இந்த முன்னெடுப்பில் தங்களின் பங்கு குறித்து பில்லியன் ஹார்ட்ஸ் பீட்டிங் ஃபவுண்டேஷனின்  திருமதி. இ அவந்தி ரெட்டி தலைமை உத்தி அதிகாரி மற்றும் சிஎஸ்ஆர் (CSR) செயல்பாடுகளின் தலைவர் திருமதி. சுதா ஜிஜாரியா பேசுகையில், "மருத்துவச் சேவைகளை மருத்துவமனைகளின் சுவர்களைத் தாண்டி மக்கள் வசிக்கும் இடங்களுக்கே நெருக்கமாக கொண்டுபோய் சேர்ப்பதே எங்களின் முயற்சியாகும். இத்திட்டத்தின் செயலாக்கப் பங்காளராக இணைந்திருக்கும் நாங்கள,  இந்த முன்னெடுப்பானது மக்கள் மத்தியில் அளவிடக் கூடிய, சிறப்பான தாக்கத்தை ஏற்படுத்துவதை உறுதி செய்வோம். மார்ஷ் இந்தியா நிறுவனத்தின் நிதி ஆதரவுடனும்,  அப்போலோ மருத்துவமனையின் மருத்துவ நிபுணத்துவத்துடன் செயல்படும் இந்த ஆம்புலன்ஸ்கள், மருத்துவ அவசரநிலைக்கும் உரிய நேரத்தில் மருத்துவச் சிகிச்சை வழங்கப்படுவதற்கும் இடையேயான இடைவெளியைக் குறைக்க உதவும். நாங்கள் அனைவரும் ஒருங்கிணைந்து மக்களின் நலனுக்காக ஒரு வலுவான அவசரகால சிகிச்சை அமைப்பை இதன் மூலம் உருவாக்குகிறோம்" என்றார்.

இந்தக் கூட்டணி குறித்து மார்ஷ் இந்தியா நிறுவனத்தின் தலைவரும் தலைமைச் செயல் அதிகாரியுமான திரு. சஞ்சய் கெடியா கூறுகையில், "எங்களின் சிஎஸ்ஆர் திட்டத்தின் மூலம் பில்லியன் ஹார்ட்ஸ் பீட்டிங் ஃபவுண்டேஷன் மற்றும் அப்போலோ மருத்துவமனையுடன் இணைந்து அவசரகால மருத்துவ சேவைகளை வலுவாக மேம்படுத்துவதில் நாங்கள் பெருமிதம் கொள்கிறோம்.  மருத்துவ அவசரநிலை ஏற்படும்   நேரத்தில் விரைவான மற்றும் பயனுள்ள மருத்துவ உதவிகளை மக்கள் பெறுவதற்குத் தேவையான ஆதாரவசதிகள், செயலாக்கத் திறன் மற்றும் மருத்துவ உள்கட்டமைப்பு ஆகியவற்றை இந்த ஒத்துழைப்பு திட்டம் ஒன்றிணைக்கிறது" எனத் தெரிவித்தார்.

இந்நிகழ்ச்சியில் அப்போலோ மருத்துவமனையின் ஹெல்த்கேர் லாஜிஸ்டிக்ஸ் பிரிவின் தலைமை இயக்க அதிகாரி திரு. விஜய வர்மா எஸ், மற்றும் வானகரம் அப்போலோ ஸ்பெஷாலிட்டி மருத்துவமனையின் தலைமை இயக்க அதிகாரி திரு. கார்த்திக் ராமமூர்த்தி ஆகியோரும் கலந்து கொண்டனர்.

இந்த ஆம்புலன்ஸ் சேவையின் தொடக்கமானது, அவசரகால மருத்துவ உள்கட்டமைப்பை மேம்படுத்தவும் உரிய நேரத்தில் மருத்துவ சிகிச்சையை வழங்கவும் இந்த மூன்று நிறுவனங்களின் பகிரப்பட்ட உறுதிப்பாட்டை பிரதிபலிக்கிறது. மார்ஷ் இந்தியா நிறுவனத்தின்  சிஎஸ்ஆர் அர்ப்பணிப்பு, BHB-ன் சமூக நலன் அடிப்படையிலான செயலாக்கம் மற்றும் அப்போலோ மருத்துவமனையின் மருத்துவ மற்றும் அவசரகால சிகிச்சை நிபுணத்துவம் ஆகியவற்றின் மூலம் சமூக அளவில் நிலையான தாக்கத்தை உருவாக்குவதே இந்த ஒத்துழைப்பு திட்டத்தின் இலக்காகும். அவசரகாலச் சிகிச்சையை இன்னும் விரைவாகவும் எளிதாகவும் மக்களுக்கு கிடைக்கச் செய்யும் பொதுவான தொலைநோக்குப் பார்வையை இந்த முன்னெடுப்பு பிரதிபலிக்கிறது. ஏனெனில், உயிர்களைக் காப்பாற்றும் விஷயத்தில் அவசரநிலை ஏற்பட்டதற்குப் பிந்தைய ஒவ்வொரு நொடியும் முக்கியமானது!