அதானி முந்த்ரா விமான நிலையத்தின் வணிக ரீதியிலான விமான சேவைகள் இன்று அதிகாரப்பூர்வமாக தொடங்கியது

குஜராத் மாநிலத்தில் உள்ள அதானி முந்த்ரா விமான நிலையம் தனது வணிக ரீதியிலான விமான சேவைகளை அதிகாரப்பூர்வமாகத் தொடங்கியுள்ளது. இதன் ஒரு பகுதியாக, ஸ்டார் ஏர் (Star Air) நிறுவனம் செவ்வாய்க்கிழமை முதல் முந்த்ரா நகரிலிருந்து எட்டு புதிய விமானச் சேவைகளை அறிமுகப்படுத்தியுள்ளது.

இந்த நடவடிக்கை வர்த்தகம், வணிகம், தளவாடங்கள் (Logistics) மற்றும் சுற்றுலாத் துறைக்கான பயண நேரத்தைக் கணிசமாகக் குறைப்பதுடன், ஒரு விரைவு வழித்தடத்தை (Express corridor) உருவாக்குவதற்கும் வழிவகுக்கும்.

இந்தியாவின் மிகப்பெரிய தனியார் துறைமுகமான முந்த்ராவின் பொருளாதார வளர்ச்சியை இந்த விமானச் சேவை மேலும் துரிதப்படுத்தும் என எதிர்பார்க்கப்படுகிறது. இந்த புதிய இணைப்பின் மூலம் முந்த்ரா நகரை ஹிண்டன், சூரத், பெலகாவி, பெங்களூரு, கோலாப்பூர் மற்றும் நாந்தேட் ஆகிய முக்கிய இந்திய நகரங்களுடன் ஸ்டார் ஏர் நிறுவனம் நேரடியாக இணைக்கிறது.