இன்று (ஜூலை 29) சர்வதேச புலிகள் தினம்!
காடுகளின் சூழலியல் சமநிலையைப் பேணிப் பாதுகாப்பதில் முதன்மைப் பங்களிக்கும் புலிகளைப் பாதுகாக்கவும், அவற்றின் முக்கியத்துவத்தை உலகெங்கும் உள்ள மக்களுக்கு உணர்த்தவும் ஆண்டுதோறும் ஜூலை 29-ஆம் தேதி சர்வதேச புலிகள் தினம் அனுசரிக்கப்படுகிறது.
2010-ஆம் ஆண்டு ரஷ்யாவின் செயின்ட் பீட்டர்ஸ்பர்க் நகரில் நடைபெற்ற சர்வதேச புலிகள் உச்சி மாநாட்டில், அழிவின் விளிம்பில் இருக்கும் புலிகளின் எண்ணிக்கையை இரட்டிப்பாக்க வேண்டும் என்ற உயரிய நோக்கத்துடன் தீர்மானம் நிறைவேற்றப்பட்டு இத்தினம் அறிவிக்கப்பட்டது.
சட்டவிரோத வேட்டையாடுதல், காடழிப்பு, மனித-விலங்கு மோதல்கள் மற்றும் காலநிலை மாற்றம் போன்ற அச்சுறுத்தல்களால் புலிகளின் வாழ்விடங்கள் சுருங்கி வரும் சூழலில், காடுகளின் ஆரோக்கியத்திற்கும் பல்லுயிர் பெருக்கத்திற்கும் புலிகள் எவ்வளவு அவசியமானவை என்பதை விழிப்புணர்வு முகாம்கள் மூலம் மக்களிடம் கொண்டு சேர்ப்பதே இதன் முக்கிய நோக்கமாகும்.
இந்தியாவில் ‘பிராஜெக்ட் டைகர்’ போன்ற சிறப்புத் திட்டங்கள் மூலம் புலிகள் காப்பகங்கள் உருவாக்கப்பட்டு, திறம்படப் பாதுகாக்கப்பட்டதன் விளைவாக உலகின் பெரும்பான்மையான புலிகள் வாழும் புகலிடமாக நம் நாடு திகழ்கிறது.
